ისტორიის მანძილზე კაცობრიობა მუდამ ცდილობდა, ახსნა ეპოვნა ისეთი საკითხებისთვის, რომლებიც იმ მომენტში მათი გონებისთვის მიუწვდომელი იყო. ამ მცდელობამ მრავალფეროვანი ვარიანტები წარმოშვა – ღმერთები და დემონები, მოჩვენებები და სულები, ზებუნებრივი არსებები და უცხოპლანეტელები. როგორც კვლევები აჩვენებს, ყოველ მეოთხე ამერიკელს სჯერა, რომ დედამიწაზე შემჩნეული ამოუცნობი მფრინავი ობიექტების უმცირესი ნაწილი მაინც სამყაროს სხვა წერტილში მყოფი ცივილიზაციის შემოქმედებაა. მრავალ ადამიანს სწამს, რომ ჩვენს პლანეტას წარსულში უცხოპლანეტელები სტუმრობდნენ და შესაძლოა, მსგავსი მოვლენები ამჟამადაც ფიქსირდება. თუმცა მათი არსებობის „მტკიცებულებების” უმეტესობას რეალურად სხვა ახსნა აქვს.

● უძველესი ნახატები გამოქვაბულებში
როცა აღმოაჩინეს ხელოვნების უძველესი ნიმუშები, რომლებიც უცნაური ფორმის არსებებსა და ფიგურებს გამოსახავდნენ, ბევრისთვის ეს აღმოჩნდა ბიძგი, დაეჯერებინა „უძველესი ასტრონავტების თეორია”. მის მიხედვით, პრეისტორიულ ადამიანებს უცხოპლანეტელები სტუმრობდნენ, ურთიერთობა ჰქონდათ მათთან და უზიარებდნენ ცოდნას. თეორიის მომხრეები მიუთითებენ ხოლმე უჩვეულო ფიგურებზე, რომლებიც გამოსახულია მაგალითად კამონიკას ხეობაში (იტალია) და ავსტრალიის კლდეებზე. რეალურად, კამონიკას არეალში 20 000-მდე ნახატია და მათგან მხოლოდ ორია გამორჩეული ფორმის, ვანჯინას ნახატების (ავსტრალია) კვლევა კი აჩვენებს, რომ დროთა განმავლობაში ნახატებზე ახალი ნიმუშები იხატებოდა და ამას სისტემატური ხასიათი ჰქონდა, რაც ბუნდოვანს ტოვებს საკითხს, რას გამოსახავდნენ რეალურად პირველყოფილი ადამიანები.

● ეგვიპტური ორნამენტები
UFO-თი გატაცებული ადამიანების მტკიცებით, ეგვიპტის ქალაქ აბიდოსში მდებარე ოსირისის ტაძარი შეიცავს უძველესი მოწინავე ტექნოლოგიის მტკიცებულებებს. ზოგიერთი იეროგლიფი თითქოს თვითმფრინავის ან ლამბაქის ფორმის საფრენი მოწყობილობის გამოსახულებაა. თუმცა კვლევები აჩვენებს, რომ ამ უცნაური ფორმის მიზეზი ძირითადად ეროზიაა და არ წარმოადგენს იეროგლიფების თავდაპირველ ვარიანტს. მიუხედავად ამისა, მათ, ვინც მასში არამიწიერ წარმოშობას ეძებენ, არ აკვირვებთ ის ფაქტი, რომ მსგავსი გამოსახულებები არ გვხვდება სხვა ადგილებში არსებულ ათასობით ტექსტებში, ხოლო ეგვიპტურ ლიტერატურაში მფრინავი აპარატები ნახსენები არაა.

● ნასკას ხაზები
ნასკას ხაზები — ეს არის ასობით უზარმაზარი და უძველესი გეოგლიფის ჯგუფი პერუს სამხრეთით, ნასკას ფერდობზე. გამოსახულებებში ამოიცნობთ გეომეტრიულ ფიგურებს, ჩვეულებრივ ხაზებს, თევზებს, ცხოველებს, ფრინველებს, ადამიანებს და ა.შ. ზოგიერთი მათგანი სიგანეში 180 მეტრს აჭარბებს და მთლიანი აღქმა მხოლოდ ზემოდან, ჰაერში ყოფნისას შეიძლება. ამის გამო ნასკას რეგიონის შესახებ მრავალი სპეკულაცია გავრცელდა, განსაკუთრებით აქტიურობენ „უძველესი ასტრონავტების თეორიის” მომხრეები, რომელთა აზრითაც უძველეს პერუელებს შეეძლოთ ფრენა მაღალი ტექნოლოგიების გამოყენებით ან ამ ნიშნებს უცხო ცივილიზაციის წარმომადგენელთათვის აეროდრომის ფუნქცია ჰქონდა. მეცნიერთა მოსაზრებით, ნასკას ხაზების დანიშნულება სპირიტუალური იყო. გეოგლიფთა წამყვანი მკვლევარი მარია რაიხე (რომელიც 50 წელი იკვლევდა ნასკას საკითხს) მიიჩნევდა, რომ ფიგურებს ჯერ მცირე ფორმებით ამზადებდნენ, ხოლო შემდგომ საჭირო მსხვილ ზომებში ქმნიდნენ. ამის დასამტკიცებლად მას ამავე რაიონში აღმოჩენილი მცირე ზომის ესკიზები მოჰყავდა. გარდა ამისა, ისტორიკოსების დახმარებით მსგავსი ფიგურების შექმნა მოხერხდა ისე, რომ გამოიყენეს პრიმიტიული ხელსაწყოები და არც ვერტმფრენიდან დაკვირვება გახდა საჭირო.

● ანტიკიტერას მექანიზმი
ეს მექანიზმი საათის მსგავსი გამომთვლელი ინსტრუმენტია და ქრისტეს შობამდე 85 წელს შეიქმნა, აღმოჩენა კი 1900 წელს მოხდა საბერძნეთის კუნძულ ანტიკიტერაზე. მას გემებზე ნავიგატორად იყენებდნენ, რადგან ნებისმიერ დროს ზუსტად ადგენდა მზის, მთვარისა და 5 ცნობილი პლანეტის ადგილმდებარეობას. მოწყობილობა წარმოადგენდა რთულ სისტემას და აშკარად სჯობდა მე-14 საუკუნის პერიოდამდელ საათებსა და ასტრონომიულ ხელსაწყოებს. ამან UFO-ს მოყვარულებში გააღვივა აზრი, რომ მის შექმნაში უცხოპლანეტელები იყვნენ გარეულნი, რადგან იმ პერიოდში ასეთ რთულ ტექნოლოგიას ადამიანები ვერ შექმნიდნენ. თუმცა თუკი ეს მართლაც ასე იყო, არამიწიერი არსებები სავარაუდოდ დანარჩენი პლანეტების შესახებაც მოუთხრობდნენ ბერძნებს. თანაც ძველ ბერძნებს მსგავსი მექანიზმები აღწერილი აქვთ ლიტერატურაში ისე, რომ არ ახსენებენ სხვა პლანეტიდან მოსულ სტუმრებს.

● საკარას ჩიტი
აღმოაჩინეს 1898 წელს სამარხების გათხრისას ეგვიპტის რეგიონ საკარაში. სიაში მოყვანილი სხვა პუნქტების მსგავსად, მასაც უკავშირებენ უცხოპლანეტელებსა და წარსულში არსებულ საფრენ ტექნოლოგიებს. „უძველესი ასტრონავტების თეორიის” მიმდევრებს სჯერათ, რომ ეს ნივთი მფრინავი აპარატის მოდელი იყო, რადგან მისი ვერტიკალური სტაბილიზატორი (კუდი) მოგვაგონებს თვითმფრინავის დაბოლოებას, როცა ფრინველებს, როგორც წესი, ჰორიზონტალური კუდი აქვთ. გარდა ამისა, მას არ აქვს ფეხები, ხოლო ფრთების კუთხეს აეროდინამიკურ მანევრირებას უკავშირებენ. თუმცა მკვლევართა მიერ ჩატარებულმა ტესტებმა, რომელიც მოდელის მიხედვით საფრენი მოწყობილობის შექმნას ისახავდა მიზნად, აჩვენა, რომ მას არ გააჩნია ფრენისთვის საჭირო აეროდინამიკური თვისებები. თანამედროვე მეცნიერული თეორიები გვამცნობენ, რომ ის ან რელიგიური არტეფაქტი იყო, ან უბრალოდ ბავშვების სათამაშო.

● დოგუს ფიგურები
დოგუს ფიგურები წარმოადგენენ ჰუმანოიდური ფორმის ნაკეთობებს, რომლებიც პრეისტორიულ იაპონიაში დამზადდა. მათი არაბუნებრივი გარეგნობა ბევრისთვის კოსმონავტის სპეციალური აღჭურვილობის მსგავსი ტანისამოსის ანალოგიაა, რომელიც შედგება სპეციალური სათვალისგან, აბჯრისა და მილებისგან. უცხოპლანეტელებთან კავშირის თეორიის მომხრეები ხშირად აიგნორებენ იმ ფაქტს, რომ დიდი თვალები ფიგურების მხოლოდ ნაწილში გვხვდება და არ აქვს საყოველთაო ხასიათი, არქეოლოგები კი აღნიშნავენ მათ მსგავსებას ინუიტების თვალსაფართან, რისი მეშვეობითაც დაბრმავებისგან იცავენ თავს. ფიგურები უმეტესად დაზიანებულია, მათ ხშირად აკლიათ კიდურები. ნაკეთობების გაფართოებული თეძოები, დუნდულები და გამოკვეთილი მკერდი მიგვანიშნებს, რომ მათი დანიშნულება სავარაუდოდ ნაყოფიერების რიტუალში მონაწილეობა იყო.

● მინდვრის წრეები
1966 წელს ავსტრალიის ქალაქ ტულის სიახლოვეს მაცხოვრებელი გლეხი ირწმუნებოდა, რომ ლამბაქის ფორმის ხომალდი იხილა, რომელიც მინდორზე დაეშვა. გადმოცემის მიხედვით, მან ახლომახლო ლერწმები მოცელა და მრგვალი ფიგურები შექმნა, შემდეგ კი აფრინდა. წლების შემდეგ ამ ამბით შთაგონებულმა ორმა ინგლისელმა იონბაზმა სამუშაო ხელსაწყოების მეშვეობით მსგავსი მოხაზულობების გაკეთება გადაწყვიტა ახლომდებარე მინდვრებში. შემდეგ ამას სხვებმაც მიჰყვეს ხელი და გასულ საუკუნეში 10 000-მდე შემთხვევა დაფიქსირდა 26 ქვეყანაში, თუმცა მათი 90% სამხრეთ ინგლისზე მოდის. იმის მიუხედავად, რომ გარკვეული კატეგორიის ადამიანთა მოსაზრებით, ეს უცხოპლანეტელთა მოწინავე ტექნოლოგიის შემოქმედებაა და არამიწიერ გზავნილს წარმოადგენს, რეალურად ისინი ადამიანთა ქმნილებებია და უმეტესად ტურისტების მიზიდვის მიზანი ჰქონდა, ინტერნეტში გავრცელებული ფოტოების ნაწილი კი მხატვრების შემოქმედებაა.

● ნორვეგიული სპირალი
2009 წლის დეკემბერში ჩრდილოეთ ნორვეგიის ცაზე უზარმაზარი სპირალი გამოჩნდა, რაც ბევრმა უცხოპლანეტელთა ვიზიტად აღიქვა. უჩვეულო ვიზუალური ფენომენი 2-3 წუთი გრძელდებოდა და წარმოადგენდა ჰორიზონტზე მოკაშკაშე ლურჯ ნათებას, რომელიც თანდათან იმატებდა სიმაღლეში, შემდეგ მიიღო თეთრი შეფერადება და საბოლოოდ გაქრა. რუსეთის მთავრობის მხრიდან გაკეთებული ოფიციალური ახსნა არც ისეთი ფანტასტიკური იყო: აღმოჩნდა, რომ ეს ყოფილა რუსული სამხედრო რაკეტის წარუმატებელი ტესტი, სპირალური ეფექტი კი ან ძრავის დაშლამ გამოიწვია, ან საწვავი მასალის წვამ, სანამ არ ამოიწურა და რაკეტა ზღვაში არ ჩავარდა.

● სტოუნჰენჯი
პრეისტორიული მეგალითური მონუმენტი ინგლისის სამხრეთ-დასავლეთში აიგო ქრისტეს შობამდე 2400 წელს. მისი დანიშნულება და შენების პრინციპი დიდი ხნის განმავლობაში იყო და დღემდე არის დავის საგანი. ზოგადად მიიჩნევა, რომ ადამიანების მიერ აიგო, რადგან დღევანდელ ეპოქაშიც მომხდარა მსგავსი სიმძიმის ბლოკების გადაადგილება და ზიდვა პრიმიტიული იარაღებით. თუმცა „უძველესი ასტრონავტების თეორიის” მომხრეთა განცხადებით, სტოუნჰენჯის განლაგება იმაზე მიანიშნებს, რომ ძველ დროს დაბნელებების წინასწარმეტყველება შეეძლოთ. ეს კი თავის მხრივ იმაზე მეტყველებს, რომ მათ ჰქონდათ ცოდნა მთვარის კვანძებზე – ორ წერტილზე, რომლებშიც ჩვენი პლანეტისა და მისი თანამგზავრის ორბიტების კვეთა ხდება. ამ ცოდნას კი სხვისი დახმარების გარეშე ვერ მიიღებდნენ, ან მრავალ თაობას უნდა შეესწავლა ციურ სხეულთა მოძრაობა, შეენახა ინფორმაცია და დროთა განმავლობაში დაეხვეწათ. თანამედროვე მეცნიერება მეორე ვერსიას ემხრობა, მაგრამ არც ისაა გამორიცხული, რომ ამ ადგილს ზედმეტად დიდი ასტრონომიული დატვირთვა მისცეს და რეალურად მის შემქმნელებს ეს განზრახვა სულაც არ ჰქონიათ.

● გიზის პირამიდები
მსოფლიოს სხვადასხვა წერტილებში არსებული მეგალითური ნაგებობების მსგავსად, გიზის პირამიდებსაც უცხოპლანეტელების ცოდნაზე დაფუძნებულ შემოქმედებად თვლიდნენ, რისი ერთ-ერთი ძირითადი მიზეზიც მისი სიდიდეა. ბევრი ადამიანი ფიქრობს, რომ ასეთი ნაგებობების შესაქმნელად ძველ ეგვიპტელებს სათანადო ტექნოლოგია არ გააჩნდათ, ხოლო ბლოკების გაჭრასა და გადაადგილებას ისე ზუსტად ახერხებდნენ, რომ გამეორება დღევანდელ ეპოქაშიც კი შეუძლებელია. ასევე ამბობენ, რომ სამი პირამიდის განლაგება ორიონის თანავარსკვლავედისას ემთხვევა, ხოლო სიმაღლე დადგენილია მზესა და დედამიწას შორის მანძილის მიხედვით. თანამედროვე კვლევები აჩვენებს, რომ გიზის პირამიდების ტექნოლოგიაში ნამდვილად იგრძნობა ინჟინერიისა და მათემატიკური ცოდნის გამორჩეული დონე, თუმცა მათზე გავრცელებული ამბების უმეტესობა რეალობას არ ესადაგება.

● რელიგიები
ცივილიზებული უცხოპლანეტელების არსებობის მომხრეების ნაწილი ასევე მიუთითებს ძველ რელიგიურ ტექსტებზე, რომლებიც, მათი აზრით, უცხოპლანეტელების ვიზიტს ასახავს. ამ მხრივ განსაკუთრებით გამოირჩევა ეზეკიელის წიგნი და ინდუისტური ვედური ტექსტები, ხოლო ზოგიერთი რელიგიური მიმდინარეობის შემთხვევაში, როგორიცაა რაელიზმი და საენტოლოგია, უცხოპლანეტელების არსებობა და მათთან კავშირი მოძღვრების შემადგენელი ნაწილია. „უძველესი ასტრონავტების თეორიის” მიმდევრები არგუმენტად ხშირად იშველიებენ ე.წ. კარგოს კულტებს. ეს კულტები პრიმიტიული, იზოლირებულ კუნძულებზე მცხოვრები ადამიანების მიერ შექმნილი მარტივი რელიგიური სისტემებია, რომლებიც ცივილიზებული ქვეყნების მოსახლე ადამიანების სტუმრობის შემდეგ შეიქმნა. მაგალითად, II მსოფლიო ომის პერიოდში ამერიკელი ჯარისკაცები დაეშვნენ პატარა კუნძულ ტანაზე, რომელიც ვანუატუს ეკუთვნის, რათა დასაჯდომი მოედნები შეექმნათ იაპონიის წინაღმდეგ ბრძოლისთვის. ადგილობრივმა ტომელებმა ჯარისკაცები ღმერთებად აღიქვეს, ხოლო როცა ისინი გაფრინდნენ, ერთგვარი რიტუალები შექმნეს, როგორიცაა არმიის სტილში მარშირება, ასევე დაიწყეს დასაჯდომი ადგილების შენება იმ იმედით, რომ „ღვთიური სტუმრები” ისევ ეწვეოდნენ. უფოლოგების ნაწილი ვარაუდობს, რომ უძველესი რელიგიები სწორედ ასე ჩამოყალიბდნენ და ზებუნებრივი არსებები, როგორიცაა ღმერთები, ანგელოზები, დემონები, სულები და ა.შ., სინამდვილეში უცხოპლანეტელები იყვნენ.

ბოლო დროს ინტერნეტსაიტებზე უცხოპლანეტელების შესახებ ინფორმაციები მომრავლდა. სტატიების ავტორები ამტკიცებენ, რომ უახლოეს მომავალში დედამიწას უცხო პლანეტებიდან "სტუმრები” ეწვევიან, რომლებიც ადამიანებთან კონტაქტსაც დაამყარებენ. ამ სტატიებს ბევრი სკეპტიკურად უყურებს, რადგან უცხოპლანეტელების არსებობა არ სჯერათ.

პარანორმალური მოვლენების მკვლევარმა, გოჩა დანელიამ თავის წიგნში "დედამიწის ცქერით დაიღალა მთვარე” ბევრი ისტორიული ფაქტი აღწერა, სადაც სწორედ ამო–ზე, ანუ ამოუცნობ ობიექტებსა და დედამიწის "სტუმრებზეა” საუბარი. ავტორის ნებართვით, ამ წიგნიდან რამდენიმე ამონარიდს გთავაზობთ.

"ამო–ს ადრეული გამოსახულებები ესპანეთის, საფრანგეთის და ჩინეთის გამოქვაბულებებშია შემორჩენილი. მათი წლოვანება 10–15 ათასი წელია. ვარსკვლავებში გაფრენის შესახებ უძველეს დროში ძალიან ბევრს წერდნენ. საფრენ მანქანებზე საუბარია ძველ ტიბეტურ ტექსტებში, ეგვიპტურ პაპირუსებსა და ინდიელთა ლეგენდებში. ძველი ქრონიკები დაწვრილებით აღწერენ კოსმოში მოგზაურობას და მონაყოლს ნახატებითა და აპარატების აღწერილობით ადასტურებენ.

ერთ–ერთ ადრეულ წერილობით საბუთად, სადაც ამო–ა მოხსენიებული, მიჩნეულია ეგვიპტის V|| დინასტიის ფარაონის, თემოს მესამის მატიანე. მისი ტექსტი ასეთია: "ზამთრის მესამე თვეს, წელსა 27, დღის 6 საათზე ციდან ჩამოეშვა ცეცხლოვანი რგოლი. იგი ელვარებდა მზეზე მეტად. ადამიანები მუცელზე გაწვნენ, შემდეგ კი გაემართნენ ფარაონისკენ. მისი უდიდებულესობა ჩაფიქრდა, რადგან ასეთი მოვლენა სულ უფრო ხშირად მეორდებოდა. ფარაონი ჯართან ერთად ცისკენ იყურებოდა. ვახშმის შემდეგ რგოლები ზევით, სამხრეთის მიმართულებით გაუჩინარდნენ. ფარაონმა გუნდრუკის კმევა ბრძანა, რათა დედამიწაზე სიმშვიდეს დაესადგურებინა და ფაქტი "სიცოცხლის წიგნში” ჩაწერა”.

ჩვენს ერამდე V|| საუკუნის წყაროებში ხშირადაა ნახსენები იეზიკიელის მიერ დანახული ცეცხლოვანი ეტლი, რომელიც დაეშვა დედამიწაზე და თვითმხილველი ბორტზე აიყვანა. "ეტლის შუაგულიდან გამოჩნდა ადამიანის მსგავსი ოთხი ცხოველი”, – იტყობინება წყარო. მონათხრობი, განსაკუთრებით კი ეტლის დაჯდომა და აფრენა, რეალურს უახლოვდება.

ბელგიელმა მისიონერმა, ალბერტ დორვილმა ტიბეტის ქალაქ ლხასაში ასეთი ჩანაწერი გააკეთა: "1661 წლის ნოემბერში ჩემი ყურადღება ცაზე მოძრავმა საგანმა მიიპყრო. ჯერ მეგონა, რომ ეს უცნობი ჯიშის ფრინველი იყო, მაგრამ ახლოს მისვლისას სხეულმა ჩინური შლაპის ფორმა მიიღო. ის ნელ–ნელა ბრუნავდა. ქალაქის თავზე ორი წრე დაარტყა და გაუჩინარდა. ჩემს თავს ვეკითხებოდი, სიმაღლის გამო ხომ არ მომეჩვენა, მაგრამ ლამას რომ ვკითხე, დაინახა თუ არა, თავი დამიქნია და მითხრა: "შვილო ჩემო, რაც დაინახე, ჯადოსნობა არაა. სხვა სამყაროს არსებები არიან, რომლებიც ასწლეულების მანძილზე გვსტუმრობდნენ. მათ განავითარეს დედამიწის პირველი ადამიანები… ჩვენ მათი კარგად გვესმის. ისინი ხშირად ეშვებიან ჩვენს მონასტრებთან და გვასწავლიან იმას, რამაც წარსულის კატაკლიზმების დროს სამყარო შეცვალა”.

უძველეს ჩინურ ხელნაწერებში ჩვენს ერამდე V| საუკუნეში დედამიწაზე ამო–ს სტუმრობის ფაქტია აღწერილი. ერთ–ერთი ჰუმანოიდი, ხუან დი გარკვეული დროით იმპერატორიც კი გამხდარა. მან ჩინელებს ჭის გათხრა, მუსიკალური ინსტრუმენტების დამზადება, ნემსის ჩხვლეტით მკურნალობა და ბევრი სხვა რამ ასწავლა. შემდეგ კი თავის 70 თანატომელთან ერთად "დრაკონზე ამხედრებული” სიუნიუნას თანავარსკვლავედზე გაფრინდა.

დღემდე გამოუცნობი რჩებოდა, თუ როგორ დაამარცხა მშვილდ–ისრებით შეიარაღებულმა სიუს ტომმა 1876 წელს პოლკოვნივ კასტერის კბილებამდე შეიარაღებული რაზმი. ინდიელთა ლეგენდის მიხედვით, მათ ამ ბრძოლაში ღმერთები დაეხმარნენ. არქეოლოგმა ანუელა ბრუერმა და ცენტრალური სადაზვერვო სამმართველოს კრიპტოგრაფმა უოლტერ ფრობერმა არ დაიზარეს და ეს ვერსია შეამოწმეს. ბრძოლაში დაღუპულ ამერიკელ ჯარისკაცთა თავის ქალები გულდასმით შეისწავლეს. მათი უდიდესი ნაწილი გამდნარ მდგომარეობაში აღმოჩნდა. ეს მხოლოდ მძლავრი ლაზერული სხივის გამოყენებით იყო შესაძლებელი, რაც უცხოპლანეტელთა ნახელავზე მიუთითებს.

გერმანელმა არქეოლოგებმა ტიგრომისის ნაპირებთან მიაკვლიეს ელექტრობატარეებს, რომლებსაც გალვანურ ელემენტს და ვოლტზე 2.000 წლით ადრე იყენებდნენ. ჭურჭელში მჟავისგან შეჭმული ლითონის ცილინდრები იყო. გალვანური ელემენტი აღადგინეს და დენი გამოიმუშავა.

1967 წლის 13 ოქტომბერს საბჭოთა არმიის ქვედანაყოფებმა რაკეტით ჩამოაგდეს თეფშის მაგვარი ობიექტი. ნამსხვრევებიდან 5 ტანდაბალი ჰუმანოიდი გამოვიდა. ისინი ერთ ჯგუფად შეგროვდნენ და ბურთისმაგვარ მასად იქცნენ. მასა აგუგუნდა და აფეთქდა. როცა ყველაფერი ჩაწყნარდა, გაირკვა, რომ 25 სამხედრო მოსამსახურიდან მხოლოდ ორი გადარჩა, 23 კი გაქვავდა. უცნობი ენერგიის წყალობით, შეიცვალა დაღუპულთა რბილი ქსოვილების და შინაგანი ორგანოების სტრუქტურა.

წყარო : SANA.GE

დაახლოებით ოცი წლის წინ, მთელი მსოფლიო უცხოპლანეტელებზე ალაპარაკდა. მათ შორის, საქართველოშიც მათი გამოჩენის არაერთი ფაქტი დაფიქსირდა. თვითმხილველები ყვებოდნენ, როგორ დაჯდა უცნაური მფრინავი თეფში დედამიწაზე, როგორ გამოვიდნენ იქიდან უცნაური გარეგნობის არსებები და ასე შემდეგ. ბევრმა ანომალიური შემთხვევები საკუთარ საცხოვრებელშიც დააფიქსირა და ურწმუნო ადამიანებს ჯიუტად არწმუნებდნენ, რომ მათ ბინაში უცხოპლანეტელები ესტუმრნენ. ბოლო დროს მსგავს მოვლენებზე აღარავინ საუბრობს, თითქოს ეს თემა წარსულს ჩაბარდა და სხვა პლანეტებიდან თუ განზომილებიდან „მობერილმა ქარიშხალმა” ჩაიარა. თუმცა, როგორც ასტროლოგი მიხეილ ცაგარელი ამბობს, ის მფრინავ თეფშებს დღესაც გარკვევით ხედავს ღამღამობით და იმ ადამიანებსაც ესაუბრა, ვისაც უცხოპლანეტელები სულ რამდენიმე ხნის წინ ესტუმრნენ.

მიხეილ ცაგარელი: უცხოპლანეტელებთან დაკავშირებული ბუმი დაიწყო დაახლოებით 90-იანი წლებიდან, შემდეგ კი თანდათან მიწყნარდა, თუმცა, თავის დროზე ბევრი ითქვა და დაიწერა, ფილმებიც კი გადაიღეს და უამრავი დოკუმენტური მასალა დაიდო არქივში. მაგრამ, კაცმა არ იცის, ეს მასალა ნამდვილია თუ მოგონილი. თუმცა, დიდი ინტერესის შემდეგ ჩავარდნა ჩვეული მოვლენაა. როგორც კი რაიმე სენსაციური მასალა გამოჩნდება და, ეს მოსალოდნელია 2012 წელს, მაშინ ისევ გაღვივდება ინტერესი უცხოპლანეტელების მიმართ. პირადად მე, ბავშვობიდან მაინტერესებდა მსგავსი თემები. სულ პირველად უცხოპლანეტელების ხომალდი სვეტიცხოვლის კედელზე ვნახე და გაოცება ვერ დავმალე. ვიფიქრე, ნეტავ, ეს რა არის-მეთქი. ვიკითხე, მაგრამ ვერავინ გამცა ნორმალური პასუხი. კარგა ხნის შემდეგ მივხვდი, რომ ჩვენი წინაპრები მსგავს რამეებში იმდენად გათვითცნობიერებულები იყვნენ, რომ ეკლესიის კედელზეც კი გამოსახეს უცხოპლანეტელების ხომალდი. რასაკვირველია, ყველას აინტერესებს, ნამდვილად არსებობენ თუ არა უცხოპლანეტელები და ამ კითხვას მეც ბევრი მისვამს.

– მერე, თქვენ რას პასუხობთ?

– მინდა გითხრათ, რომ უცხოპლანეტელები ნამდვილად არსებობენ და დღესაც ჩნდებიან დედამიწაზე. ისინი მთვარეზეც სხდებიან და დედამიწაზეც და ეს ჩემი თვალით მაქვს ნანახი დოკუმენტური მასალიდან. მათ შესახებ ინფორმაცია ჯერ კიდევ ძველ ეგვიპტელებს ჰქონდათ და უძველესი დროის ნახატებიც კია შემორჩენილი. ეზოთერიკაში არსებობს მოსაზრება, რომლის მიხედვით, დედამიწაზე ადამიანი უცხოპლანეტელების მეშვეობით შემოვიდა. ზოგს მიაჩნია, რომ ეს მათი ექსპერიმენტია, ზოგის აზრით კი, ისინი სამყარომ გამოიყენა, რათა გენოფონდი შეექმნა მათი საშუალებით დედამიწაზე და ასე შემდეგ. მოკლედ, მეცნიერებს დიდი თავსატეხი ჰქონდათ მსგავს თემებზე და დღესაც მიდის კვლევა-ძიება, როგორ გაჩნდნენ ისინი, საიდან მოდიან დედამიწაზე, რას იკვლევენ აქ, რატომ ამყარებენ კონტაქტს ჩვენთან, რის გამო მიჰყავთ უცხო პლანეტებზე ადამიანები და ასე შემდეგ.

– თავად თუ გქონიათ უცხოპლანეტელებთან კონტაქტი?

– მე ჩემი თვალით მაქვს ნანახი უცხოპლანეტელთა არაერთი ხომალდი, თუმცა, უცხოპლანეტელებს პირადად არ შევხვედრივარ. ჩემი სახლიდან კარგად ჩანს ლისის ტბის ტერიტორია და ღამღამობით, აშკარად ჩანს საოცარი სინათლეები, თვალისმომჭრელი ნათებები, უცხოპლანეტელთა ხომალდების უცნაური, ტრაექტორიული მოძრაობა, შეჩერება და ასე შემდეგ. კახეთშიც არაერთხელ მინახავს მსგავსი ხომალდები. მაგალითად, ქიზიყში, ვნახე უცხოპლანეტელთა ხომალდების სასწაული ნათებით ფრენები. არნახული სიკაშკაშე და ნათება ახასიათებს მსგავს ხომალდებს. ისინი ძირითადად ღამით მოდიან დედამიწაზე, იშვიათად, რომ დღისით მოვიდნენ. სხვათა შორის, უნიკალური მასალები აქვს მოძიებული ბატონ თალეს შონიას. ის იყო ერთადერთი ადამიანი, რომელიც საქართველოში წლების განმავლობაში იკვლევდა მსგავს ფაქტებს, უამრავი მოწმე ჰყავდა დაკითხული და თავადაც ჰქონდა პირდაპირი კონტაქტი უცხოპლანეტელებთან. საოცრად დიდი საკვლევი მასალა დატოვა მან, თუმცა, მისი გარდაცვალების შემდეგ, მსგავსი თემებით ასე ღრმად არავინ დაინტერესებულა. არ დამავიწყდება გოგონა, რომელიც ახლა ავსტრიაში ცხოვრობს, მაშინ კი დიდუბეში ცხოვრობდა და ჰქონდა არაერთი კონტაქტი უცხოპლანეტელებთან. ის ისეთ ინფორმაციას მაწვდიდა, რომელსაც ბევრი ფანტასტიკის სფეროს მიაწერდა. მაგრამ მე კარგად ვიცოდი უცხოპლანეტელების მუშაობის სტილი, ქცევა, რას ემყარება მათი მოქმედება და ეჭვი არ მეპარებოდა, რომ გოგონა სიმართლეს ამბობდა. ეს გოგონა კარგად ხატავდა და საოცარ ჩანახატებს აკეთებდა, ანუ, ხატავდა იმას, რასაც ხედავდა, მაგალითად: როგორ შედიოდნენ უცხოპლანეტელები მის ოთახში, რამდენნი იყვნენ, როგორი გარეგნობის, სიმაღლის, სახის და ასე შემდეგ. ამ გოგონას არ თიშავდნენ, ისე მიჰყავდათ იუპიტერზე და სრული სიზუსტით მიყვებოდა დაბრუნების შემდეგ პლანეტათა განლაგებას კოსმოსიდან. მისი სახლის სახურავზე ჯდებოდა ხომალდი, ის ჯდებოდა მასში, ყვებოდა როგორ ჩაუფრენდა მთვარეს, მარსსა და ვენერას, ჰქონდა ზუსტი ჩანახატები, როგორი იყო იუპიტერი. ერთხელ ასეთი კითხვაც კი დავუსვი: გასაგებია, რომ მათ წაგიყვანეს დედამიწიდან შორს, მათ პლანეტაზე, მაგრამ რისთვის ჩაგიყვანეს, რა უნდოდათ შენგან-მეთქი.

– რა გიპასუხათ? ან, რა ენაზე ეკონტაქტებოდა უცხოპლანეტელებს ის გოგონა?

– მიპასუხა, მათ ჩვენი შესწავლა უნდათო. რაც შეეხება საუბარს, მითხრა, კონტაქტი ტელეპათიურ დონეზე, ხმის ამოუღებლად ხდებოდაო. ანუ ისე, როგორც ტელეპათებს შეუძლიათ კონტაქტი ჰიპნოზის საშუალებით. ეს არის შიდა გონებრივი ენერგია, ყოველგვარი ენის გამოყენების გარეშე, ინფორმაციის ენერგეტიკული გადაცემა, როდესაც ადამიანი უსიტყვოდ იგებს, რა უნდა მეორე ადამიანს. ამ გოგონას ძალიან გაუჭირდა აქ ცხოვრების გაგრძელება და უცხოეთში წავიდა.

– აქ რატომ ვეღარ შეძლო ცხოვრება?

– იმიტომ, რომ რამდენიმე ადამიანს უამბო ეს ამბები, მათ კი დასცინეს და ფსიქიატრიულ საავადმყოფოში მისვლა და მკურნალობა ურჩიეს. ერთ დღესაც, მოვიდა ჩემთან და აღელვებულმა მომიყვა ეს ამბები. დავამშვიდე, დავაწყნარე, ავუხსენი, რომ სრულიად ნორმალური ფსიქიკა ჰქონდა, უბრალოდ, საზოგადოება ჯერ არ იყო მზად მსგავსი ინფორმაციის მისაღებად. მაგრამ მან მაინც გადაწყვიტა წასვლა და მას მერე კონტაქტიც დავკარგე. სხვათა შორის, მანვე გამანდო: უცხოპლანეტელებმა მითხრეს, მოერიდეთ მარსიდან მოსულებს, მათ მოწითალო ფერის კანი აქვთ და ენდეთ იუპიტერელებს, რომლებსაც მოლურჯო-მოცისფრო კანი აქვთ. მარსელები, ისევე, როგორც იუპიტერიდან მოსულები, სწავლობენ ადამიანების რასას, მათ ფიზიოლოგიურ, ფსიქოლოგიურ, გონებრივ შესაძლებლობებს, მაგრამ ისინი იყენებენ კიდეც ადამიანებსო, ანუ, კვლევებისთვის მათ სჭირდებათ ადამიანთა ტვინი, მიჰყავთ ისინი და კლავენ, იუპიტერელები კი შესწავლის შემდეგ აუცილებლად აბრუნებენ ადამიანებს დედამიწაზე და გამოჯანმრთელებაშიც ეხმარებიანო, ასეთ გამოჯანმრთელებულ, უცხოპლანეტელებისგან განკურნებულ ადამიანებს მეც შევხვედრივარ. ასე რომ, უცხოპლანეტელების ორი ჯგუფი არსებობს და ამას ბატონი თალეს შონიაც აღიარებდა.

– ბატონო მიხეილ, ბოლო დროს საქართველოში როდის დაფიქსირდა უცხოპლანეტელების სტუმრობა?

– უცხოპლანეტელებთან კონტაქტები სულ არის. გასული წლის ზაფხულში ქიზიყში, შევხვდი ერთ კაცს, რომელმაც მიამბო, როგორ დაჯდა ხომალდი ველზე, იქიდან როგორ გადმოვიდა ორი უცხოპლანეტელი და გონებრივი ენერგიით როგორ შედგა მათ შორის კონტაქტი. ამ კაცს აწუხებდა გულ-სისხლძარღვთა პრობლემები და, როგორც თავად მითხრა, კონტაქტი ორმოცი წუთის განმავლობაში მიმდინარეობდა, იისფერი ტალღები მიდიოდა მისკენ და ბოლოს ტელეპათიურ დონეზე მიახვედრეს, რომ ის უკვე გამოჯანმრთელებული იყო. ეს კაცი მეორე დღესვე გაქცეულა ექიმთან და, გამოკვლევები რომ ჩაუტარებია, ექიმი გაოგნებულა – პაციენტს არანაირი პრობლემა აღარ ჰქონდა და გულიც საათივით მუშაობდა. ეს ბოლო კონტაქტია უცხოპლანეტელებისა, რასაკვირველია, რაც მე ვიცი.

– რა კრიტერიუმით არჩევენ ისინი საკონტაქტოდ ადამიანებს?

– ეს არავინ იცის. ის კი არა, ვამბობთ მარსიდან და იუპიტერიდან მოდიან ისინიო, მაგრამ, იქნებ, სხვა პლანეტებიდანაც გვაკითხავენ? კაცმა არ იცის. ისინი თავის კოსმიურ მისიას ასრულებენ დედამიწაზე მოსვლით და აკეთებენ იმას, რასაც უბრძანებენ ზედა მფარველი ძალები.

– ესე იგი, ისინი კოსმიურ მისიას ასრულებენ დედამიწაზე?

– დიახ, სწორედ ასეა. მათ ბატონ თალეს შონიასთან კონტაქტის დროს აღიარეს: მოვა დრო, როცა ჩვენ შესახებ ბევრს გაიგებთ, მაგრამ, ეს დრო ჯერ არ დამდგარა და ვერაფერს გეტყვით, რადგან თქვენ ჯერ სათანადო განვითარების დონეზე არ ხართო. წარმოიდგინეთ, ისინი იმ ევოლუციურ დონეზე არიან, რომ სხვა პლანეტარულ სისტემებში საკუთარი ხომალდებით გადადიან, სამასი წელი ცოცხლობენ და შეუძლიათ ტელეპათიურად კონტაქტის დამყარება. სხვათა შორის, მათი ხშირი სტუმრობა დედამიწაზე ხდება მაშინ, როცა საომარი სიტუაციებია მოსალოდნელი.

ჟურნალისტი და ხელოვნებათმცოდნე ნონა ჯაჯანიძე ამტკიცებს, რომ გასული საუკუნის 90–იან წლებში უცხოპლანეტელებთან კონტაქტი ჰქონდა.(მე არ მჯერა და თქვენი აზრი დაწერეთ).

– ქალბატონო ნონა, როგორ დაიწყო თქვენი კონტაქტი უცხოპლანეტელებთან?

– პირველი შეხება 1990 წლის აპრილში მქონდა. მაშინ ერთ–ერთი გაზეთის რედაქტორი ვიყავი. იმ პერიოდში გავრცელდა ინფორმაცია, რომ გურიაში ერთ–ერთ ოჯახში უცნაური რაღაცეები ხდებოდა. სკოლის მოსწავლე გოგონა უცნაურ არსებებს ხედავდა, სახლშიც სხვადასხვა ნივთი ცვიოდა. თითქოს უჩინარი ხელი რაღაცეებს ისროდა. ეს ამბავი მთელ საქართველოში გახმაურდა. ტელევიზიებში სიუჟეტებიც გაკეთდა. მე, როგორც ჟურნალისტს, გურიაში ჩასვლა მინდოდა, მაგრამ ცოტა ხანში შემატყობინეს, ის გოგონა რუსთავში ჩამოიყვანესო. მეც რუსთავში ვცხოვრობ. გამიხარდა, იმ გოგონას სანახავად შორს წასვლა რომ არ დამჭირდა.

– გოგონას სახლში რა ნახეთ?

– ნამდვილად უცნაური რაღაცეები ხდებოდა. ჩვენ წინ საგნები "დაფრინავდა”. იმ დღეს შვილები სახლში ვერავის დავუტოვე. ამიტომ მათთან ერთად წავედი. იქ ცნობილი უფოლოგი თალეს შონია და ოპერატორი დაგვხვდა, რომელიც იმ ყველაფერს ფირზე იწერდა. მერე ის კადრები ტელევიზიითაც აჩვენეს. ჯერ ვაშლი "გამოფრინდა” და იატაკზე დაეწება, მერე – პური, ბოლოს კი სამზარეულოს დანაც ისროლეს. დანა კედელს მოხვდა და იატაკზე ჩაცურდა. ჩემს შვილებს ისე შეეშინდათ, ტირილი დაიწყეს, დედა, აქედან წავიდეთო. საინტერესო ის იყო, რომ იმ ოჯახში იმ მომენტში ვაშლი და პური არ ჰქონდათ.

– ნივთებს პოლტერგეისტი ხომ არ ისროდა?

– სხვათა შორის, პოლტერგეისტის ფენომენს წლების განმავლობაში ვსწავლობდი. მაინტერესებდა, რა მოვლენასთან გვქონდა საქმე. ზოგი პოლტერგეისტს ოჯახის სულს ეძახდა. უცხოპლანეტელებმა კი სხვანაირად აგვიხსნეს. პოლტერგეისტი იგივე ენერგეტიკაა, რასაც ერთმანეთთან კონტაქტის დროს გამოიყენებთ. ამ დროს ბურთის მაგვარი მასა წარმოიქმნება და ის ხმაურობს, ნივთებს ადგილს უცვლისო. იმ შემთხევევაში კი ნივთებს უცხოპლანეტელები ისროდნენ.

– ქალბატონო ნონა, თანამიმდევრულად გვიამბეთ. იმ გოგონასთან რომ მიხვედით, თქვენი პირველი კონტაქტი მაშინ დამყარდა?

– სწორედ ასე იყო. მერე კი ჩემთან უფრო ახლო კონტაქტში შემოვიდნენ.

– რა ენაზე გესაუბრებოდნენ?

– ჩვენი კონტაქტი ტელეპატიურ ენაზე ხდებოდა. გონებაში ფრაზები შემოდიოდა და მეც ასევე ვპასუხობდი.

– ამ ნაწერებზეც გვითხარით, როგორ წერდნენ?

– როგორც გვითხრეს, ისინი იეროგლიფებით წერდნენ, მაგრამ ამ ქაღალდებზე ქართული ასოებია გამოსახული. ჩვენთან ურთიერთობისას ზოგჯერ ამ ფორმას იყენებდნენ. ქართულ ასოებს ამსგავსებდნენ. თითქოს უჩინარი წერდა, მხოლოდ ფანქარი მოძრაობდა და ასოები გამოჰყავდა. ზოგჯერ კი ფანქარი საერთოდ არ მოძრაობდა, თავისით იწერებოდა.

– ვიზუალურად თუ ხედავდით და როგორები იყვნენ?

– კი, ზოგჯერ მეჩვენებოდნენ. ისინი, ვინც ჩვენ გვეკონტაქტებოდა, მაღლები, ადამიანის მაგვარი არსებები იყვნენ. 25 სანტიმეტრიან არსებებსაც ვხედავდით. დავინტერესდი და ვკითხე, რომელი პლანეტიდან ხართ–მეთქი. მითხრეს, ჩვენ წითელი ვარსკვლავიდან ვართო. რომ გამოვთვალეთ, გამოვიდა, რომ პლანეტა ვენერადან იყვნენ.

– მათი ჩამოსვლის მიზანი რა იყო?

– ექიმები იყვნენ და სხვადასხვა დაავადებას კურნავდნენ.

– კიდევ რას გეუბნებოდნენ?

– მაგალითად, მითხრეს, რომ საქართველოში მიწისძვრა მოხდებოდა და სამი ადამიანი დაიღუპებოდა. მართლაც ასე მოხდა. რაჭასა და საჩხერეში მომხდარ მიწისძვრას სწორედ ამდენი ადამიანი ემსხვერპლა. ასევე მითხრეს, მალე ქაღალდის ჭამას დაიწყებთო. როცა პურზე ტალონები შემოვიდა, მაშინ მივხვდი, მათი ნათქვამი რასაც ნიშნავდა. კითხვებზე მოკლე პასუხებს გვაძლევდნენ. არ უყვარდათ, როცა შეკითხვებით თავს ვაბეზრებდით.

– მათთან კავშირი რატომ დაკარგეთ?

– მათთან ურთიერთობა 5 თვის მანძილზე მქონდა. მერე კი, უბრალოდ, ჩვენგან წავიდნენ. მითხრეს, რომ 17–18 წელში უკან დაბრუნდებოდნენ. ეს დრო ახლა დადგა და ვგრძნობ, რომ ისინი ბრუნდებიან. ამას იმ სხივითაც ვგრძნობ, რომელიც სახლში შემოდის. ისინი ჩვენს პლანეტას მხოლოდ სიკეთეს მოუტანენ.

წყარო:ჟურნალი "თბილისელები”